早排有線電視搞咗個《政壇單打》，畀班政圈人隻揪，今日播呢集由Tree根鍾樹根對陳淑莊（Tanya），佢哋兩個好可能喺9月立法會選舉爭港島區議席，鏡頭前兩人開心玩「單打」，鏡頭後兩人對話內容仲過癮。
話說Tanya喺鏡頭前問Tree根，係咪真係要把根留住？Tree根立即頂番句，話Tanya講嘢越嚟越似民記主席李慧琼！Tanya即時滴晒汗話，李慧琼講嘢好似冇表情喎！質疑自己有乜理由似琼子！
停機後Tanya同Tree根更加收唔到口。Tanya笑Tree根，如果佢同王維基喺港島區單打，就可以再用當年「金句」，叫維基「收皮」多一次！Tree根哈哈大笑！究竟係乜金句？咪就係：「王維基得幾十億身家，收皮啦！」