這部用上透明機面的無線喇叭，到底又是甚麼玩法？答案是可以在機面透明屏幕上同步顯示加上特別視覺效果的歌詞，係唔係型先？這部由日本Six開發的Lyric Speaker LS1，剛剛開始在日本接受預訂，並且會在今個星期內擺放在伊勢丹新宿店、銀座三越之旗艦店同日本橋三越本店，讓大家睇睇真身兼率先預訂！
LS1機身機面設有一塊22吋大型透明屏幕，只要以Apple Play連上iPhone，或以Google Cast連上Android手機播放歌曲，系統就會直接在網上音樂庫下載歌詞並以好似跳舞的視覺效果呈現，音樂庫目前已收錄逾120萬首日本及西方主流歌曲，唔一定只限聽日文歌。一眼就睇晒，喇叭內置一對同軸單元，機身搭載一對被動式輻射器以營造出強勁的低音，不過要玩到這款咁有型的喇叭，都要預留咁上下的擺放空間及金錢先得；機身體積本身已達到52×14×35cm，重達11kg，而定價亦高達324,000日圓（折約$24,100），預計9月14日正式公開發售。
記者：布偉倫
