趣趣地：
北愛爆大冷踢走烏軍

北愛爾蘭周四喺歐國盃C組爆冷贏烏克蘭2:0，錄得喺決賽周首勝同埋保持入16強希望，但輸波嘅烏克蘭就成為今屆賽事首支出局嘅球隊。
北愛憑麥奧尼喺49分鐘頂入同埋麥真恩喺補時六分鐘執雞，爆冷擊敗贏烏克蘭，36歲嘅麥奧尼成為歐國盃史上第二最老入波球員；賽後佢哋以兩戰得三分排第三位，仍然有機會打入16強，遺憾嘅係佢哋有個叫羅拔雲尼嘅62歲球迷喺看台睇睇吓波心臟病發死咗。
由於兩戰得零分嘅烏克蘭對賽輸畀北愛，就算最後一場贏波蘭亦唔可能入到16強，成為今屆決賽周首支出局球隊。

梅拿腳頭無靈　德國悶和波蘭

之後登場嘅德國雖然有中堅曉姆斯復任正選，但最終仍然同波蘭摸和0:0，兩軍一樣係兩戰得四分，分別排小組第一、二位；而德軍射手湯馬士梅拿仲未打破喺歐國盃決賽周嘅入球荒，加埋上屆踢咗六場仍然係零入球，睇嚟教練路維要諗諗計至得喇。