冰島喺今屆歐國盃首場分組賽1:1賽和葡萄牙，賽後中場艾朗根拿臣想同基斯坦奴朗拿度（C朗）換波衫，點知小器C朗冇睬佢。唔少球迷都睇唔過眼，覺得C朗太小家，仲有冰島粉絲喺社交網站發起根拿臣換波衫活動#ShirtsForAron，上載張波衫相上網，畀根拿臣揀嚟交換，其中有球迷上載張相，係一隻着住九號衫仔嘅貓貓。根拿臣見到有咁多球迷關心佢，應該會覺得好窩心，唔使恨C朗件波衫喇。