今個星期三（6月15日），除了中國又俾MSCI請食檸檬外；同時亦都是國家主席習近平生日。越野兔有個驚人發現，原來習大大與技安是同一日生日！唔怪之作風咁鬼似啦！
眾所周知，技安在漫畫入面的角色長期蝦蝦霸霸，由於身形在同輩中最龐大，所以大家表面上好似對佢俯首稱臣，不過心底裏都唔係好妥佢。
就好似習大大時常外訪，懶friend咁同其他國家打好關係，次次都簽埋好多鐵路合約、機建合同。不過近年簽簽埋埋嘅，一係就取消，一係就郁都未郁，委內瑞拉嗰啲直頭貼埋大床低息借貸畀人起，家陣又係爛尾。成日焗人哋要晒你啲賣剩蔗，你真係當人儍仔咩！你估握多幾次手就真係做到好朋友㗎，連英女皇咁識做人，都喺背後講你壞話，就可想而知。
除了霸道，技安另一樣特色當然係唱歌難聽到黐線，仲要成日都開演唱會逼大家聽，簡直是bad taste終極代表。
習大大都不遑多讓，總之咩都要跟着中國式邏輯進行。上海迪士尼經過無限妥協後終於開幕，不過《獅子王》裏面有孫悟空，《丁滿與彭彭》變咗京劇，米奇老鼠成功變身土豪金鼠，真係沒有更bad taste！
P.S.我心目中叮噹就係叮噹，技安就係技安，那有胖虎與多啦A夢。
越野兔
本欄逢周五刊出