人有錯手，鬼揞眼做錯事好多人都試過，不過好似民主黨林卓廷咁嘅遭遇，就比較罕見。其實呢次唔係阿廷嘅錯，話說佢日前開記招交代廉署放生前廉署社區關係處處長穆斐文一事，唔少傳媒都有報道，但有媒體就大字標題寫「民建聯林卓廷：難以服眾」。嘩，阿廷幾時變咗穆斐文老公、民政事務局局長劉江華嘅黨友呀？
呢段來自《香港投資日報》嘅報道，查實都幾詳盡報道咗阿廷個記招，而內文亦有提到阿廷係民主黨總幹事，只係個標題出事囉！
阿廷知道自己「被轉黨」變咗禮義廉一員，就喺臉書笑稱《香港投資日報》同佢開咗個大玩笑，仲好幽默咁落咗tag，例如「咁你都知」、「我個樣似劉江華咩」、「我寧願死囉」。而八方最欣賞嘅tag就係「好彩唔係話卿姐唧」，連卿姐都夠膽玩埋，唔怕被卿姐鬧佢離晒大譜？