生產「快譯通」電子辭典做到成行成市嘅譚偉豪，因做過資訊科技界立法會議員而為人所熟悉，但自從2012年再選立法會時，輸畀莫乃光，加埋電子辭典畀互聯網同智能手機App搞到冇啖好食，近年都甚少見到佢身影。難得噚日喺一個論壇再見到佢，不過佢好似有啲失修，冇當年喺立法會執得咁正喎。
譚偉豪敵不過科技狂潮，舊年將產銷「快譯通」嘅權智（601）賣走，套現逾2億元。咪以為佢拎住筆錢慢慢搣、嘆世界，佢唔做廠佬，就轉去做「天使投資人」，去搵唔同嘅新產品投資，更加成為「香港天使投資脈絡」主席。
作為一名前廠佬，佢噚日就幫畢馬威主持一個論壇，討論如何在港推動「工業4.0」與「再工業化」。
可能譚偉豪冇廠一身輕，唔使再為間廠煩惱，中年男人嘅「天敵」即刻出現：就係發福，而且又冇以前做議員時執得咁正，個頭有啲亂囉。