新世界發展（017）近年股價甚為低殘，唔知係咪因為咁，吸引到創辦人鄭裕彤嘅女婿杜惠愷密密增持。根據聯交所資料，由年初至今，佢增持超過30次，差不多1億股，使近6.4億錢。
雖然話佢嘅持股量只有1.16%，但按昨收市價7.19元計，佢手貨市值7.8億元。
做得「彤叔」女婿，今年72歲嘅杜惠愷亦非等閒之輩。杜惠愷嘅爸爸杜若波，早年從上海來港開設豐盛珠寶，跟彤叔老友鬼鬼。杜惠愷從美國碩士畢業後，就同彤叔千金鄭秀霞結婚，之後就加入新世界，佢家陣係新世界非執行副主席。
3年前，有傳媒爆料，指融創（1918）與綠城（3900）合共斥資90億元人仔，買入上海豪宅項目豐盛皇朝，賣方正是杜惠愷，市傳佢因此獲利50億元。所以呢，佢拎十億八億買股票，應該都係閒事。