人走茶涼，現實就係咁殘酷，何況鬥到你死我活嘅政圈？好似今屆立法會選舉咁吖，民建聯決定喺港島只係派出一張名單出選，但就由副主席張國鈞領軍，上屆先「升呢」嘅鍾樹根除非肯做阿二，否則冇得選！嘩，大石砸Tree根，難怪Tree根怒不可遏，考慮退黨保議席。只係考慮階段咋，Tree根已經「被砍伐」，就咁當垃圾俾人遺棄路邊，真係陰功豬！
被張國鈞取代
不過大家唔好誤會，Tree根仲健在嘅，唔使擔心佢安危，因為被斬嘅係佢嘅banner箒！有線眼同八方講，喺筲箕灣道某處嘅垃圾桶，發現一條由民建聯主席李慧琼、Tree根、民記區議員王志鍾「擔綱」嘅橫額，變成垃圾被丟棄，而附近掛起嘅新民記橫額，李慧琼同王志鍾不變，但Tree根已經換成張國鈞。
呢個火速除根行動，唔只現實，仲反映咗佢哋都幾騰雞，唔通係驚張國鈞會俾Tree根搶晒飛？
八方問Tree根，點睇自己被「砍伐」？見慣大風浪嘅佢冇乜嘢喎，淡淡然話有啲橫額位係李慧琼、王志鍾或者大主席曾鈺成嘅，人哋都要宣傳㗎嘛，況且掛多兩個星期，咪又會換！難得佢睇得開，係咪已經決定退黨所以唔同佢哋計較？Tree根話仲諗緊係咪自己豎支旗出嚟選！
原來東區西灣河嘅工黨區議員麥德正，都見到Tree根可憐被砍，佢唔評論Tree根狀況，但希望大家清潔香港，唔要嘅Tree根請放入垃圾桶，唔好污染環境喎。
李八方
mailto:[email protected]