澳門賭業猛人周焯華（洗米華）噚日帶同太陽娛樂文化旗下藝人鄧麗欣（Stephy）同劉浩龍（師兄），現身灣仔會展出席公司活動。洗米華上個禮拜獨自去倫敦會Mandy Lieu，盛傳佢陪Mandy生B仔，佢噚日喺活動全程神情輕鬆，唔知係咪已再做老竇？活動結束後，佢同Stephy等人影大合照，亦有企定定畀傳媒影單人相，問到Mandy係咪已生B同幾時返香港，佢只係友善咁回望咗一眼，冇答到。
Stephy冇見過小方
師兄女友容祖兒噚日36歲生日，之前祖兒為御用化妝師離世難過，師兄話：「今晚暫時冇節目，盡量低調度過，因為唔係太開心。」再問會唔會出街食飯同準備禮物，佢就話：「乜嘢都好，等我過咗呢個日子先再答大家。」
另外，Stephy同張繼聰住同一屋苑，有指舊愛方力申借探張繼聰為名搵佢，Stephy否認：「唔知佢有冇探張繼聰，冇見過，亦冇探過我。」小方日前接受無綫節目訪問，強調二人由始至終冇提過結婚，但承認Stephy半年前曾問佢有冇諗過將來。節目中又被問到若李安搵佢拍情慾文藝片，會唔會揀Stephy做對手，小方話：「我哋兩個再拍，有噱頭，我仲可以嗌高啲價㖭！會尷尬，所以咪要畀多啲錢囉！」
撰文：馮仁昭
