恒生銀行（011）執行董事馮孝忠（Andrew）出名係乒乓波好手，但原來睇足球都好大癮！歐國盃開鑼，唔少banker捱更抵夜追波睇，Andrew都唔例外。
話說今年歐國盃E組堪稱本屆死亡之組，因為四支實力球隊比利時、意大利、瑞典與愛爾蘭抽埋一組，分組賽要使出真功夫先可以晉級16強。
尤其係上星期比利時對意大利嗰場，Andrew凌晨3點就起身睇到完場。不過，比利時縱然有名將夏薩特同迪比利，但最終都係令人大跌眼鏡，被睇淡一線嘅意大利贏2:0。
Andrew都話「意大利真係被低估，突擊打得好好」，不過就對比利時入四強仍然保持樂觀，仲有信心會贏有「戰神呂布」伊巴坐鎮嘅瑞典㖭。
「伊巴嘅波路唔可以打1人球隊，踢中鋒要其他球員配合，自己利害冇用嘅！」Andrew就話，如果愛隊法國、比利時、德國打入四強，佢就幾夜都要起身睇，仲話決賽約埋班同事出街睇都唔定。大家呢排如果見到馮總熊貓眼，千祈唔好話係華華講嘅。