法國周三喺馬賽主場出擊，以2:0擊敗阿爾巴尼亞，A組兩戰全勝率先打入歐國盃16強。不過，唔好以為贏波過程好輕鬆，法國呢場變陣打4-2-3-1，收起保羅普巴同基沙文，轉用京士利高文同安東尼馬迪爾一對年輕翼鋒，諗住可以拉開阿國防線，但「銀河唯一」基奧特把握力麻麻，全場五次攻門都冇進賬，嬲到要拉低條褲發洩，77分鐘仲被調離場，由基格納入替。
Ludivine雙嬌撐起WAGs
法國苦戰到90分鐘先由後備上陣嘅基沙文頭槌打破僵局，加上皮耶喺補時六分鐘建功奠勝，真係一額汗。佢哋兩戰全勝嘅頭號功臣當然係韋斯咸中場皮耶，兩場波各入一球，咁啱「槌仔」領隊比歷幫緊英國電視台做評述員，見到愛將入波都跪拜佢。另外，法國WAGs一向質素唔錯，以前人氣最盛嘅係沙格拿老婆Ludivine Kadri，但皮耶呢期紅，佢老婆咁啱又係叫Ludivine，呢場着埋八號波衫捧場，自然成為傳媒焦點。同組另一場，瑞士逼和羅馬尼亞1:1後兩戰得四分，羅馬尼亞就以一分排第三。