四年一度歐國盃，令球迷有機會透過足球認識歐洲各國嘅政治同文化。你會唔會好奇法國點解咁多黑人球員？點解比利時要用韋莫斯先鎮得住更衣室？點解沙加兄弟會代表唔同國家？點解有德國人唔想同謝路美保定做鄰居？
上面每條問題，都可以寫上千字解釋，但簡單嚟講，全部係種族問題。杜倫沙加同格列沙加嘅父母嚟自科索沃，走難到瑞士後生咗佢哋，所以兩兄弟都有資格代表瑞士。咁點解杜倫沙加可以代表阿爾巴尼亞？因為佢哋係阿爾巴尼亞族人。瑞士同阿爾巴尼亞今屆被稱為A隊同B隊，因為兩隊有好多雙重國籍球員，阿爾巴尼亞陣中有六個球員喺瑞士出世；而瑞士陣中亦有四個球員喺前南斯拉夫地區出世，有阿爾巴尼亞、波斯尼亞或馬其頓血統嘅球員就更多。當年巴爾幹半島戰爭，令大量難民湧向西歐同北歐；走去西歐嘅，有沙加兄弟嘅父母，而走咗去北歐嘅，最出名就有伊巴謙莫域嘅父母。
情況就好似近年敍利亞難民湧入歐洲一樣，其中德國收容咗好多難民；小弟可以好肯定咁話，大約10年後，德國國家隊會出現唔少敍利亞裔球員。不過，家陣湧入嘅難民太多，令德國本地人反感，右翼主義抬頭，唔單止針對敍利亞難民，仲針對埋喺德國土生土長嘅黑人謝路美保定，所以有右翼政黨話唔想同佢做鄰居。點先係自己人？唔只歐洲要諗，我哋香港人都要反思。前排睇咗個新聞節目，講土生土長南亞裔人士嘅生活，就算佢哋識講廣東話，香港人都唔當佢哋係自己人，連租樓都難。點解香港種族歧視問題好似冇歐美咁嚴重？我諗只係因為呢班被歧視嘅南亞裔人太小眾，小眾到冇人為佢哋發聲。
文：咖喱