上星期日早上喺屋企刨緊馬經，預備去馬場之際聽到朋友Stanley劉展灝突然逝世嘅消息，為之一呆。左丁山識佢十幾年，好似係Roy Chung（鍾治平）介紹嘅，阿Roy做完工業總會主席之後，就輪到劉展灝，佢退任後，由鄭文聰接任，但因為特區政府鍾意Stanley，又搵佢去香港生產力促進局做主席，政府點解捉住佢唔放？與佢相識有年嘅朋友都知道，史丹利忠於職守，平易近人，說話不慍不火，絕不走極端，但能夠堅守工商界立場，做商會代表，為商界出聲，係最佳人選，今時今日，特區政府可信任可用之人，更而且係有料之人，唔係咁多㗎咋，故此史丹利成為商界公職王，甚有道理。
左丁山同史丹利有時講公事（如強積金對沖、標準工時、輸入勞工、香港廠商在珠三角開廠之環境），有時講馬，不時在馬會凱旋廳碰到佢一家人在飲茶，佢亦係喜歡跑馬之人，養過好多隻馬，均已退役，例如彪形大漢、彪形好漢、彪形勇漢、彪形勁漢、好時間、分秒必爭等，可惜馬運麻麻，拉頭馬次數就唔多，五月二十九日在沙田馬場七樓碰到佢，佢捉住左丁山猛讚「一片光明」有前途，唉，點知嗰次就是最後一面。
史丹利站穩資方立場，一啲勞工代表對佢好唔滿意，佢最後一次出席標準工時論壇，竟被工人擲假髮（代表假立法），帶有侮辱性，實在令人遺憾，其實史丹利讀完中學就打工，從事鐘錶業，到咗1988年就自行創業，成為老闆，係白手興家嘅典型，由打工仔成為廠家，你估佢唔識乜嘢叫做長時間工作？講笑咩，有啲勞工代表在論壇叫口號：「資方不滿意工時立法，可撤出香港」，當然係不經大腦嘅講法，假如所有資方撤出香港，香港工人去邊度搵到老闆出糧？工人自己開合作社乎？假如呢啲講法成立，啲勞工代表如要嘆世界，每周工作35小時，就不如集體移民去法國搵工啦，法國係工時短，不過工作機會亦少，年青人失業率高過香港幾倍呢！為標準工時立法，大財團反而可以負擔得起，冇乜所謂，但劉展灝不時同左丁山講，最傷會係中小企，請二十人以下嘅公司，香港多不勝數，譬如一般雜誌社、出版社、小型餐廳，就為標準工時立法非常頭痛。香港學習法國得唔得？冇話唔得嘅，睇吓社會要付出乜嘢代價嘅啫，香港目前就負擔唔起囉。