中原集團上市大計「難產」，全因兩大股東施永青同王文彥意見不合。王文彥今年3月提出三項上市重點，不過中原董事局唔肯接受。呢段時間一直得施永青講上唔到市原因，王文彥噚日就開記者會發炮，話施永青一言堂，在生一日都唔會准中原用施永青嘅諗法上市。
噚日記者會喺王文彥創立嘅怡居地產尖沙嘴總部舉行，期間只邀請個別傳媒出席。王文彥除咗婉拒冇被邀請嘅傳媒列席之外，亦同現場記者約法三章，唔准記者將新聞稿send回報館，亦唔准報即時新聞。整個記者會歷時4個鐘，足以睇兩場歐洲國家盃球賽！
王文彥喺會上重申，只可以畀中原（中國）上市，仲要成立一間私人公司，去持有上市公司65%股權，以制衡施永青勢力擴大，令到佢同施永青可以喺公司權力共享。王文彥嚴正聲名：「我入棺材都唔會用施永青個方法上市」，叫施永青以大局為重。