早排香港開咗兩個室內彈床樂園，初頭睇人玩都覺得幾過癮，任跳唔嬲又唔怕整親，只不過不停跳來跳去，跳得多都有啲悶。彈床樂園集團Ryze宣佈喺首爾開樂園，除咗彈床，仲有仿照美國障礙賽節目《Ninja Warrior》賽場嘅障礙賽區，玩家唔使上電視，都可以一嚐擒高擒低闖關滋味。每個關卡下面都堆滿海綿磚，等你闖關時就算做盡攀牆、盪吊韆鞦、踩走繩等牙煙動作，都唔怕失手整親。平時睇人玩Parkour，即係於城市中飛簷走壁嘅極限運動，幾層樓高跳來跳去，過癮一回事，跌落嚟真係無眼睇，喺首爾Ryze，就可以試埋無痛版Parkour，俾你盡情迅速跑跳穿行，萬大事都有堆海綿寶寶喺下面接住你，無有怕。首爾將會喺首個亞洲區Ryze Park，設立室內障礙賽區，下個月開始動工，預計年底開幕。
記者：盧懿靜
資料來源：Mashable, Ryze