日本宅男市場一向唔講得少，當地宅男口味隨時影響整個藝能界，好似AKB48就係最佳例子。趁住新片《貞子vs伽椰子》喺今個星期六開畫，片中主角之一貞子都瞄準宅男市場，拍攝一系列少女味濃嘅清純寫真，為谷票房一於有殺錯冇放過。
《貞子vs伽椰子》集合《咒怨》同《午夜凶鈴》三大冤鬼上演鬼打鬼情節，貞子、伽椰子同俊雄近期四出造勢，貞子仲為罐裝咖啡GEORGIA拍攝針對男士嘅「妄想女友」純愛寫真，以可愛、清純一面望吸納宅男粉絲咁話。呢個「妄想女友」系列，不嬲都搵新進偶像、水着女星扮成女友同網民模擬拍拖，今次玩嘢搵貞子化身女友，既去遊樂場又嘆咖啡，仲瞓街晒長腿，等宅男可一嚐人鬼戀滋味，宣傳攻勢真係創新到不得了。