鄰近強國嘅新奇事物，真係好似小丸子嘅問題咁天天都多，廣西玉林下星期又搞一年一度狗肉節，中外愛狗之士當然繼續大力反對。不過，秉承強國傳統：外部勢力越係反對，佢哋就越堅持嘅原則，有官方背景嘅報紙就出社評，話西方人希望改變其他人嘅飲食習慣，令人唔舒服；又話地方習俗唔應該以施壓、強制嘅方式改變，呢個係人權要義之一喎。喂，你哋咁言之鑿鑿堅持地方習俗，點解又慢慢去廣東話化，慢慢咁消滅香港本土特色文化？當然啦，官字一向兩個口，強國嘅官更加唔使講理由。
一個多民族國家都真係幾麻煩，歐洲好多國家表面好和平，好似比利時咁，世界排名去到第二，僅次於阿根廷，唔好講正選，連後備兵都星光熠熠，排得出全英超陣容。左、右兩翼夏薩特同奇雲迪布尼，身價加埋過億鎊，前鋒又有盧卡古同賓迪基等，入波應該唔成問題；不過，E組首戰對住老化嘅意大利，竟然淨吞雙蛋。
比利時其實係一個好特別嘅國家，位於荷蘭同法國交界，形成兩大主要文化區。要睇國家隊成員屬於邊一幫，睇吓佢哋青訓喺邊個國家就知，好似夏薩特同奧歷治等就屬「法國幫」，艾達韋列特同維頓漢等就屬「荷蘭幫」；而且隨住60年代開始吸納非洲移民，因傷退隊嘅隊長高柏尼、盧卡古同賓迪基都係剛果民主共和國移民後代。唔好以為比利時冇本土主義，北邊靠近荷蘭嘅佛萊明大區就因為經濟較強，成日想獨立，之前大選都有政治紛爭。所以比利時牌面係強，但成隊打唔出團結精神，外圍賽或者仲可以也文也武，但決賽周睇怕好似兩年前世界盃咁，都係雷聲大雨點小。
文：牽牛