中廣核新能源（1811）講明仲有注資，但集團家陣總市值都係得47億元，唔夠啃注資之餘，比起同系統中廣核電力（1816），細奀好多，中廣核爆殘！
中廣核現價1.08元，係2014年上市以嚟谷底價，比起上年6月高位3.6元，累跌近70%，總市值得47億元。又中廣核同系中廣核電力，市值964億元，係集團市值20倍，中廣核殘到痹！
仲要咁睇，中廣核呢個市值，係低過上年50億港元注資規模，集團亦講明，嚟緊第二輪注資，裝機規模唔會比第一次細。諗到係，中廣核呢個市值size，肯定食唔到等同規模注資，單講注資，中廣核已經有條件向上。
場內專業評估，中廣核今年EPS 0.21元，得5.2倍預測PE。上邊大唐新能源今年預測14.9倍PE，同級數行家華能新能源（958）9.1倍、金風科技（2208）7.9倍，又連A股在內行家預測平均21.8倍PE，中廣核平霸。
今年以嚟，9間大行畀中廣核平均目標價1.87元。當集團現價翻半番到1.65元咁計，都未上到呢個目標價，又今年預測7.9倍PE，亦啱先追到最近磅嘅金風。
錢雋 細價股專家
本欄逢周二、四刊出