扭蛋可以話係小朋友童年時代嘅恩物，估唔到上商行政總裁郭錫志（David），幾十歲人依然咁鍾意呢款童玩遊戲。
噚日佢哋喺中環干諾道嘅分行正式投入服務，分行內擺放咗一部扭蛋機，所有喺分行開立「慧通理財」服務嘅客戶，都可以扭扭扭抽獎一次，大獎係價值約1萬元嘅盈富基金（2800）一手，二獎都唔弱，有1,000元信用卡免找數簽賬。
David同華華傾開扭蛋趣事，佢話自己最鍾意就係扭到迪士尼卡通人物或芬蘭之光「憤怒鳥」，仲有日本Bandai玩具模型。
而本港兩間生產扭蛋機嘅公司，原來都係上商客戶，噚日干諾道分行嘅扭蛋機，就係其中一家公司產品。唔知呢份客戶緣，同郭錫志鍾情扭蛋玩意有冇關係，之不過該行零售銀行一姐Annie，就踢爆老闆嘅狂熱程度，話David辦公室入面，都有部私人珍藏扭蛋機㖭！