掌管冠君產業信託（2778）8年嘅行政總裁李澄明，將於本月退休，佢管理旺角朗豪坊多年，臨別依依，噚日佢約傳媒朋友食晏，仲大爆朗豪坊成功嘅秘密。
原來李澄明本身同旺角好有淵源，由出世到讀中學，都喺太子、旺角一帶。當年講緊仲係接生婆嘅年代，佢入讀旺角街坊小學又一村小學，經尖子計劃先提拔去讀官立嘅伊利沙伯中學，順利升讀香港大學，之後加入鷹君（041），再負責冠君與朗豪坊。佢形容，旺角係佢發源地呀。
佢算係一手一腳湊大旺角地標朗豪坊，由最初親身帶傳媒睇示範單位，到揀租戶都要經佢手，仲成日微服出巡同租戶傾偈、試菜。佢話，做生意要夠貼地，令shopper滿意先得，所以退休都好唔捨得。
但其實退休又有咩好怕喎，因為佢都plan好晒節目，會先去日本玩一轉，再約當年伊中校友去美國一齊過畢業48周年，聽落都happy。