中國A股又被MSCI拒諸門外，中證監發言人批評「任何沒有中國A股的國際指數都不完整」，葡萄酸味甚濃。馬雲話齋，「好多假貨比真貨質素更好」，不完整嘅指數，可能都好過有A股嘅完整指數，所以國際投資者只會繼續參考MSCI。中國有種，不妨自創完整的指數，挑戰MSCI霸權。
入唔入摩只係小事，英國公投、美國大選至係大事。小生於4月15日第一篇文，預測今年尚有四大驚奇，其中兩樣係歐、美再爆恐襲，促成英國脫歐、特朗普當選總統。好不幸，過去一周發生「奧蘭多基吧」槍殺案，同巴黎休班警員夫婦被殺，兩單案伊斯蘭國（IS）都承認責任，即係恐襲。特朗普贏唔贏到希拉莉，11月至知，但英國脫唔脫歐，一星期後就有分曉。
兩個月前，英國所有民調都顯示留歐佔上風，所以我至話脫歐係「驚奇」，但最近民調趨勢逆轉，脫歐唔再算奇，驚就驚在市場仍未充份反映此風險，尤其係香港，唔少論者好老定，以為英國人理性、實際，利益當前終會選擇留歐。此論調失諸以己度人。經濟無疑極重要，但英國人未至於有奶便是娘、發展是硬道理，脫歐派主張的「take back control」，重奪財政、貿易、移民、法律的自主，都好重要。市場仍低估了脫歐風險，散戶小心為上呀。
笑笑生
mailto:[email protected]
本欄逢周四刊出