有兩位老牌專業人士，一位係建築師，一位係結構工程師，本已退休，最近竟然願意接受記者訪問，講吓塌屋頂，冧青磚屋之事，連記者都覺得自己夠運，如此資深人士肯接受佢訪問。
左丁山於是去了解吓背景，方知建築師L與工程師W係唔抵得有人唔熟行情，噏得出就噏，佢地驚住有人不知就裏，信以為真（例如左丁山呢類科學盲），故此要到冧樓現場睇吓，發表吓意見。
有人大膽咁講舊中央警署原已婚警察宿舍係由青磚建造，經過百年歲月，部份青磚已受侵蝕變得薄弱如粉，故此承受不了大雨壓力而倒下，兩位老人家則完全不同意，佢地認為，建築物之倒塌，主要係結構出了問題（年代日久吖嘛），與青磚無關。據左丁山從其他渠道得悉，承建商早已察覺該建築物有倒塌危險，建議拆卸，以避免意外，成個項目由馬會斥資十幾億元支持，自然唔想見到有任何意外，但拆卸已婚警察宿舍，要古物諮詢委員會及古蹟辦批准，古諮會只以保育為重，一於企硬唔批准拆卸，馬會亦無符啫，唯有繼續揼錢，幾無辜也。
結果真係冧咗咯，點搞？建築地盤在六月底可能清理完畢，重新開工，但完成日期無人說得準，已中標可租用內部地方開設食肆嘅，基本上一定不能如期開張，要拖幾耐，又係冇人知，一啲中標人士本以為自己夠運，依家唯有大嘆倒霉，唔中好過中，請夥計埋緊班嘅，要急急叫停。一啲工程界人士同左丁山講：舊中央警署內分分鐘另有建築物陷於危險狀態，馬會最好吩咐承建商查個明白，保證不會再有同類事件發生！左丁山儍儍地咁問：「查到另有危險建築咁又點？叫古諮會批准拆咗佢呀，叫馬會停止funding呀？似乎搵馬會做丑人，搵馬會笨啫噃！」工程界人士話：「鬼叫馬會多錢又好人，政府係當馬會係隻羊嘅嘞。若果我係承建商，一發覺有危險，不怕一萬，只怕萬一，必定第一時間向馬會發危險警告信，報定案先，以免日後孭鑊。至於馬會如何處理，唔得閒諗咯，咪等馬會與古諮會談判囉！」咁又係嘅，認可人士個牌照要緊，聲譽要緊，保護自己係第一要務，至於保育成本去到天文數字咯喎，係制度的錯，無人需要負責！