土耳其喺首輪歐國盃分組賽0:1輸畀克羅地亞，莫迪歷入嗰球遠射確係靚絕，但之後睇番慢鏡，發現喺莫迪歷射波嗰陣，土耳其球員奧辛杜芬企喺射門路線但掛住整理頭髮冇幫手擋波。「梳頭哥」嘅表現惹起大量土耳其本土球迷不滿，尤其係佢效力球會費倫巴治嘅死對頭，加拉塔沙雷班球員，喺社交網站嘲笑杜芬應該去做洗頭水模特兒，亦狠批呢班新一代球員已經冇咗昔日土耳其國腳嗰種頑強鬥志。