MSCI呢單嘢，講到尾咪又係一個「女神收兵天仙局」。即係咁，中國就好似一個毒男，叫住佢「習習」先啦，一心想媾女神MSCI。
早喺2013年，女神扭住個身，甜絲絲咁同你講：「習習，你係好男仔，我想將你納入觀察名單，考慮吓你呀。」你自知以自己身世，都冇咩機，所以2014年，你俾人拒絕咗。
到2015年，你靚仔咗又有錢咗，以為女神會對你改觀，投入你懷抱。可惜嘅係，女神話，「Um…習習，你係好人，但你仲有好多問題呀。」你垂下頭，灰咗，「不過，習習，我𠵱家唔係拒絕你，只係考慮緊，如果你解決晒問題，我隨時都會接受你㗎！Muah！」臨尾拍拍你膊頭，講句加油再Send多個飛吻Emoji，你當堂冧晒。
如是者，呢一年你為咗女神，好努力改變自己，變到另一個人咁。女神鍾意人外向啲，你就搞基金互認、放寬QFII投資額度；女神又話你個人冇規冇矩，於是就搞嚴控停牌時限之類政策。
毒男一直嘅付出，連身邊朋友都感動埋。唔少花生友都走去同你講，「女神都冧你，你會成功Der」、「佢拒絕咗你兩次都仲畀機會你，即係真心鍾意你啦，今次一定得」，你老死高盛仲話，「我覺得今次你有七成機會得米！加油呀兄弟！」
至於你世叔伯索羅斯，一直就同你講，「衰仔，你咩新鮮蘿蔔皮呀！人哋千金小姐會睇上你，咪想錯你個心！」佢仲衰到出面開賭，賭今次你又俾女神拒絕！
終於到咗緊張嘅時刻，今日你生日，拎住紮花，着咗套靚靚西裝，加對Sneaker，一身韓仔打扮，行到女神面前，再一次示愛。習習拎住紮花，準備開口，意想不到係，女神先開口，而句說話竟然係：「對唔住」，之後轉身走向另一個人！呀！！！！！！！！！！！！佢走去攬住個巴基斯坦仔呀！！！！
此時此刻，你崩潰了！你上前追問女神……「點解呀！我明明…已對你百般迎合！點解！！！」「習習，你唔係唔好，你係好人，但你仲有三個問題未解決（詳見另文）」「又有問題？咩問題？係唔係我有深港通就WORK？」「習習，你錯啦，深港通係唔關事㗎。」「你呃我！你當我係水魚！」女神對眼谷住泡眼淚，「唔係呀，明年中啦，明年中前你有大進步，我會再考慮。」絕望嘅你，同女神講「我尊重你，但你冇咗我，你人生係唔會完整架！」
女神望住習習，「習習，我同巴基斯坦仔會幸福㗎，你唔係話『一帶一路』國家有前途咩？」然後轉身就走。
此時，巴基斯坦仔拖住女神，佢問：「吓？如果佢解決三大問題，你下年真係會同佢一齊？」「哈！可能到時有新問題呢！」
完
by千頌C@堆填區
http://fb.com/winbigwok