港交所（388）市場主管李國強喺交易所做咗19年，最近開始比較高調，經常出動向業界同傳媒解釋暑假推出嘅冷靜期，又要介紹7月實施嘅收市競價時段；最近佢仲身兼多一個職銜，接替行政總裁李小加嘅愛將羅力，兼任港交所旗下聯交所與期交所行政總裁（CEO）職務。
李小加自從2009年底加入港交所之後，經常出現高層變動，自己離職又有，做到夠鐘退休又有，李國強算係可以留得低，又漸漸獲李小加重用嘅舊人。
根據資料，李國強1997年加入聯交所，今年1月升任市場主管。據講，佢兼任聯交所與期交所行政總裁，屬於例行公事，方便佢直接管理現貨與期貨市場運作，唔係升職；而羅力唔做呢個位，都依然係李小加愛將，繼續負責策略性發展等宏大工作。