沈集成不愧為新晉首席谷草練馬師，這晚一開場第一場五班1800米，又見佢贏馬。
由沈集成訓練的「領航大師」上次於谷草一哩慢閘亦跑第三，開始有料到，今次匆出續配潘頓加程初跑1800米，結果成功在季內最後一場五班同程打開勝門，單Win及組合獨贏A1，分別派27及19.5元，「領航大師」鞍上人潘頓藝高人膽大，採取中段加速走甩戰略，就此大勝近五馬位。
「領航」系馬主胡偉林在港養馬多年，今季要跑到煞科前一個月至憑「領航大師」開齋，這晚郭少芸、湯盈盈、梁靖琪、文頌嫻及周家蔚五位女藝人入場為他打氣，賽後胡偉林興奮到跳起，大班人一齊拉頭馬分享喜悅，至於同主的「領航精神」現時養於吳廐只得十分，好大機會要在季後自動引退。
今場「領航大師」贏到離行離列，二至四名卻爭持激烈，結果蔣嘉琦「威旺財」同蔡明紹「樂在其中」成為平頭亞軍，第四名係韋達座騎「甜哥兒」。
沈集成表示「領航大師」上次漏閘，因為馬兒不喜歡閘內被捉住耳仔，否則理應贏出，下仗升上四班也有競爭力。而胡偉林表示非常開心，因為之前好幾次邀請一班老友入場都未能取勝，但今次賽前試閘走勢理想，所以好有信心，此馬來港前在澳洲已由胡偉林擁有，他認為此馬至少跑1600米或以上才合。