去得阿拉斯加，梗係要食長腳蟹，之但係香港嘅特首梁振英，「胃口」一向與別不同，難怪佢去到阿拉斯加，都係專注於嘆「龍蝦」！有讀者向八方報料，喺由加拿大前往阿拉斯加嘅豪華郵輪上捕獲梁特，原來佢同太太唐青儀及仔仔傳昕，一家三口坐郵輪旅行，梁太就算身在海外都着紅衫，貫徹「龍蝦太」嘅鮮明形象！
讀者︰點解佢成日放假
政府早前出稿話梁特本月11日至20日清晨，離港休假，冇透露茫茫人海到底佢去咗邊，但一如以往又喺休假時被捕獲。讀者何先生喺西岸時間周一下午6點幾、即香港時間周二上午10點，喺郵輪上發現梁特喺甲板睇風景，同行仲有傳昕同着紅色外套戴黑超嘅梁太，何生笑稱：「我第一件事諗起龍蝦！」
佢話梁特夫婦表現和諧，神情輕鬆，「唔多講嘢，都係一句起兩句止。」而一家行事低調，感覺似一般人，約5至10分鐘後離開，之後一日行程冇再重遇。何生話遇見梁特嘅第一個感受係：「點解佢成日都放大假？」而佢哋參加嘅豪華郵輪團，由溫哥華出發，前往阿拉斯加，當地時間本月11日出發，為期10日，根據唔同房型，每人費用18,999起至25,999元起，據知船上有逾千人，華人僅數十，所以梁特一家冇引起注目。
特首辦發言人回應八方查詢，話特首呢次係私人休假，費用自付，一般嚟講不論特首進行外訪定私人度假，當局都會調派保安人員向特首提供24小時嘅人身保護。
李八方
mailto:[email protected]
