巴西喺今屆美洲國家盃表現唔掂，繼87年之後近30年嚟再喺分組賽出局，教練鄧加當時仲聲大大話唔怕被炒魷，點知話口未完就喺周二被巴西足總燉冬菇冇得撈。52歲嘅鄧加喺06至10年第一次出任巴西主帥，衰衰哋都叫喺07年贏過美洲盃冠軍；14年再執教，成績一直都唔多理想。盛傳國家隊會由哥連泰斯55歲主帥迪堤（Tite）接手，後者一直都只係執教巴西本土球會，到近年帶領國際體育會同哥連泰斯，先叫有番啲知名度。