東亞銀行（023）今個月初裁員180人，成為大新聞，其後整個金融界均大刀闊斧裁員，大部份都是因為大陸業務「陀衰家」，搞到香港要炒人，咁究竟情況有幾差？有投銀及私銀朋友就大呻大陸生意難做，即使搵到客，但都開唔成單，「大陸客唔知點走啲錢嚟香港，幾個客加埋有成億想開戶口都開唔到」。
中央今年開始加強限制資金流動，要走資比以往更難，主要靠大陸客的私銀業務開始轉差，要靠本地生意支撐，但裁員都是先裁香港分行，「爛賭老母要靠個仔埋單」。不過有銀行依然無懼風險，堅持北上擴張，渣打（2888）剛剛就表示考慮明年在中國設私人銀行，大陸資金走唔到香港，銀行惟有北上接客，不過望住東亞盤數，就知大陸幾危險，況且大陸富豪都想走資，點解要將錢存入大陸的Private Bank？再睇住渣打股價，就明白咩叫「渣兜」。銀行唔要人，保險界就狂挖人，大陸越封鎖，富豪越要走資，其實現在走資剩下的正常途徑，就係買保險。雖然中央都出手阻止，但只係將保單斬件，由以往50萬美元一張單，斬成五件至十件，幫全家甚至工人買保險，業內人士就話：「有部份大行為咗搶客，唔守規矩任個客狂碌卡，甚至個客有病都唔使佢申報，就算佢在大陸查有Cancer，香港邊個知啊？」
斯郎
本欄逢周四刊出