成日聽到呢句說話：「機會嚟啦！飛雲！」之不過呢個世界又有幾多個飛雲呢？只知道如果連試嘅機會都唔畀自己，就會變成「這些機會不屬於我」的了。香港由o靚模全盛時期到blogger及最近突然爆出的KOL（Key Opinion Leader），大家都透過不同渠通突出自己，自拍已是家常便飯。不過，與其沉醉於網上世界，不如試吓衝出香港，好似Angelababy、周秀娜及諸葛梓岐等人早就喺2009年以模特兒身份遠赴日本行Tokyo Girls Collection（TGC）為港人爭光，其後人氣粉紅頭model Eva亦進軍日本行Osaka KAWAii!! Fashion show甚至拍劇拍廣告，去日本發展的確係好多女仔夢寐以求嘅夢想；加上近年吹襲嘅韓風都吸引咗唔少女仔參加明星選拔賽，衝出香港可以話係成名嘅另一黃金機會。
今次Shibuya 109聯同史上最大型時裝活動Tokyo Girls Collection（TGC）、一手捧紅安室奈美惠及濱崎步的日本娛樂公司龍頭AVEX，以及日本國內最大型社交網站Ameba舉辦「Tokyo Girls Audition 2016 Powered by Ameba」（TGA）snap攝影甄選會，於攝影選拔會合格就可直接進入Tokyo Girls Audition面試及唱歌評審，勝出者會得到Avex Group經理人合約、參加Tokyo Girls Collection演出仲有人氣時裝雜誌的專屬模特兒合約等獎項。講明係snap其實就真係影相咁簡單，不過難就難在點樣可以靠一張相展露自己才華，相信大家要返屋企對塊鏡練習吓先！只要係年屆9歲以上的女性（無錯係9歲，日本要成名係從小開始培訓嘅）、沒有專屬藝人公司、更不限國籍及身高，就可以於6月25日當天親身到尖沙嘴海港城Shibuya 109店內參加選拔，有個機會係眼前無理由唔珍惜嘅係咪？
記者：畢慧婷
