現年57歲嘅洪朝豐曾經因為抑鬱狂躁症發作而陷入「瘋狂歲月」，好在佢幾經努力下重新振作，早幾年仲開始教人打坐靜修，一切回復正軌。之前試過兩度去泰國短途出家嘅佢，下個月會再去泰國出家修行，但今次會去足9個月，之後準備移居法國，重新開始佢嘅人生。
三度短途出家
日前洪朝豐喺facebook話：「當此堪忍之世，要修得大忍辱，靜觀萬象，行走輕安，惟有靜心。我是過去3年，承蒙20多位南傳佛法僧人悉心傳授靜心心法，蒙天垂憐，學得一身功夫，過往因緣於海內外亦授學生逾1,500人，說多不多，說少不少……我是7月3日離港赴泰國曼谷，第三度入寺院，出家當南傳佛法僧人，潛心打坐靜心，一去9個月，直至2017年4月下旬回港，再移居巴黎，年屆57歲，以一個靜心歌者的身份登六，以後在巴黎發展、學習，一切從頭開始。」
洪朝豐話去泰國前會有一堂打坐，但只會教fb啲朋友。日前馮仁昭打電話畀佢，問點解移居法國，佢就話：「我覺得嗰度好適合我，有好多嘢學，可以見識，發揮我熟悉嘅嘢，我想以一個靜心歌者嘅身份重新出發。」
撰文：馮仁昭