每一個成功男人背後都有個女人支持，就好似周一晚幫意大利入波嘅前鋒加斯安奴柏利，佢嘅匈牙利名模女友維歌莉亞唔單止入場打氣，仲帶埋個柏利嘅吹氣公仔，真係為撐男友做足準備。喺呢場歐國盃E組首輪，意大利就靠基亞卓尼利同柏利各建一功，以2:0技術性擊倒名大於實、成盆散沙嘅「歐洲紅魔」比利時。
比利時名過於實吞兩蛋
呢幾年喺網上有個「月經」話題，得閒就會有網民數吓比利時班英超球星，吹噓呢隊波係大賽黑馬，吹到今屆歐國盃，比利時仲做埋冠軍熱門之一。點知，喺實而不華嘅意大利前露晒底，夏薩特同奇雲迪布尼各自為戰，盧卡古同費蘭尼庸碌無為，根本攻唔入意大利嘅「BBC」防線，即係巴沙利、邦路斯同埋基亞連尼。意大利先喺32分鐘靠基亞卓尼利開紀錄，到補時再由柏利埋齋，以2:0贏咗比利時。
柏利呢場有索女友維歌莉亞入場打氣，後者今年24歲，係匈牙利嘅泳裝模特兒。佢兩個已經拍咗拖四年，成日喺社交網站度晒幸福；講到意大利贏波嘅最大功臣，當然係教練干地啦。意大利中場傷兵多，賽前好多人都睇死佢哋分組賽出局，點知一出場就咁大驚喜，呢份功勞肯定係屬於部署得宜嘅干地。喺基亞卓尼利入波後，干地同班後備球員一齊慶祝，唔小心俾施蒙尼沙薩打中個鼻，搞到流鼻血。賽後干地仲拎呢件事嚟講笑：「我願意為呢支球隊犧牲我嘅身體！」
保方玩單槓屁股落地
除咗干地之外，保方都成為呢場比賽花邊新聞嘅主角，完場之後，佢衝向龍門，打算喺龍門架度玩單槓慶祝，點知保方呢次就保唔住後方，一時鬆手，屁股落地，撻到攤攤腰！不過保方應該冇受傷，周五對瑞典可以繼續上陣。
比利時方面，門將泰拔高圖爾斯效力車路士，佢見到下季教車仔嘅干地原來咁把炮，可能內心都百感交集。高圖爾斯賽後都認輸，大讚干地排陣至勁，「我哋喺戰術同組織方面都比唔上意大利，同埋我哋又犯咗喺友賽嘅錯誤，冇去睇住意大利嘅中路滲透。」比利時下場周六對愛爾蘭。
