潮服品牌I.T（999）舊年業績做得差，純利唔見超過三成，老闆當然要減人工，先至對小股東有所交代喇。根據I.T最新年報，主席沈嘉偉與執董胞弟沈健偉舊年齊齊冇花紅收，總薪酬減少大約45%。
雖然話減薪45%，但係兩位沈生依然袋過千萬元年薪。沈嘉偉嘅薪金、房屋津貼加埋其他福利，總薪酬達到1,754萬元，沈健偉就袋1,493萬元，呢個金額，喺𠵱家呢個經濟環境相當唔錯。
而且，兩位沈生係I.T大股東，兩人合共持股61%，公司業績轉差都仍然有股息派，粗略計算，兩人將可以合共收取股息6,216萬元，斷估應該無礙沈嘉偉嘅靚女老婆邱淑貞繼續濕平與high tea。