虛擬實境（VR）技術越嚟越火熱，或者過多幾年，一家大細唔會再齊齊睇電視，而係個個戴住部VR頭盔，盡享360度視聽娛樂感受，不過一班投資者同科網公司已經着手搵下一個代替品，繼續走在科技最前面，目前跑出嘅係名為「增強實境」（AR）嘅技術。
要知道何謂增強實境，首先要了解VR。用家只要戴上VR裝置後，眼同耳都唔受外面影響，沉醉睇戲打機最好。至於增強實境，雖然同樣戴頭罩，但並非同外界完全隔離，而是喺現有真實環境中，加設虛擬影像。
有間專門研究AR嘅美國公司Meta，第一次2,300萬美元融資，已經獲得李嘉誠有份嘅維港投資參與，早排公佈完成第二次融資，集資額達5,000萬美元，除維港投資加碼外，更搵到騰訊（700）、聯想等投資者加入，令Meta估值去到3億美元（約23.4億港元）。
中港財團都咁熱心做AR，似乎假以時日呢個技術都會大行其道。如果係咁，將來我哋咪會日日「戴定頭盔」先可以出街？