【本報訊】為吸新客，Neway曾同炙手可熱的毛記合作，溫國樑認為Neway勝在肯嘗試，在毛記未紅時已合作，形容毛記「幫你拍段片，boom一聲全世界知，好受歡迎」，奈何對方身價飛升，「搵佢好貴啦」，暫未有新合作。
播《分獎》贏hashtag
今年1月Neway為《勁曲金曲分獎典禮》提供直播，贏來一個「#多謝neway」的hashtag。毛記爆紅，亦令溫國樑想將「勁曲金曲」的改篇歌放在K房唱，奈何版權問題難以釐清，未有成事。
他指若再搵對方拍廣告，「貴㗎啦，用佢嘅budget可以自己做到5至6條片」，但當然自己做的宣傳效力會較遜色。Neway同時有在大台（無綫電視）落廣告，他坦言在TVB落廣告有機會「畀人插」，但在商言商：「大台就算話佢好差……最差都有十幾點（收視），但Viu套劇幾好睇，都係得幾點」。
他認為「大台有大台的生存空間」，其廣告多在深夜播放，能接觸深宵煲劇一族，作針對式宣傳。公司亦有與海洋公園、Uber等合作，在各大院校迎新營派紀念品、優惠劵，搞歌唱比賽等，望吸引年輕K客。