睇嚟德國教練路維玩厭咗撩鼻食鼻屎，事關佢最新迷上咗頴完蛋蛋同籮柚後再拎隻手去聞，仲要連喺操練時都忍唔住咁做。
路維周日喺德國2:0贏烏克蘭嘅歐國盃C組分組賽，俾電視鏡頭影到佢又頴完蛋蛋同籮柚，仲要係咁聞頴完個隻手，但前鋒普多斯基就力撐佢，仲話八成男人都會頴蛋蛋。日前佢帶隊操練，備戰周四對波蘭場大戰，點止又癮起，頴完籮柚後攞隻手去聞。學星爺喺《九品芝麻官》話齋，聞一聞格外醒神，索一索舒筋活絡，𦧺一𦧺唔會兩頭擺；德國踢得麻麻哋都可以贏烏克蘭兩粒，可能全靠路維呢隻充滿「香」味嘅神手囉。
另外，德國《圖片報》日前報道，德國隊長舒韋恩史迪加（下圖）即將結束鑽石王老五生涯，會喺7月12號同塞爾維亞網球手女友伊娃諾域結婚，而且仲連請帖都印埋。今屆歐國盃決賽會喺7月10號舉行，如果德國可以成功捧盃嘅話，對小豬嚟講肯定係一份最正嘅結婚禮物囉。