自認「天才」嘅33歲港足後衞李志豪，季中離開標準流浪重返國內球壇加盟中甲梅州客家，點知分隔兩地都可以修成正果，綽號虎哥嘅佢季初幫足總拍攝港超宣傳照時，同女攝影師甄詩穎（Cymbie）撻着，估唔到未夠一年就宣佈求婚成功，仲話今年大除夕舉行婚禮㖭。
除夕娶攝影師女友
上季由東方轉會流浪嘅李志豪，季內因為喺世盃外有好表現，獲國內球會梅州客家招手，仲係球隊嘅必然正選，目前聯賽穩居中游，事業都算得意，估唔到情場一樣咁得意。前晚虎哥公佈求婚成功，同識咗八個月嘅女攝影師Cymbie求婚成功。虎哥多位老友包括陳肇麒等，當然即時恭喜呢對準新人。消息話，俾一班朋友稱呼為「球壇浪子」嘅虎哥，季初拍攝港超宣傳照嘅時候識到Cymbie，兩人一見鍾情，女方一有時間就坐五、六個鐘頭車北上梅州睇男友比賽，虎哥放假亦會返嚟見女友，得閒又玩吓煮飯仔，甚至連家長都見埋，仲不時將溫馨相貼喺fb晒恩愛。
志豪話早兩個月已打算結婚，日前鼓起勇氣求婚成功，不過細節佢就唔肯講，總之「掂咗啦」。婚期落實喺今年12月31日，婚禮以天主教形式舉行，夜晚就辦婚宴。志豪大讚準太太又溫柔又細心，講到追女心得，虎哥話：「因為分隔兩地，平日靠視像電話，放假返香港見佢，就係咁簡單。」