諗住蘇亞雷斯（圖）係去季歐洲金靴，話唔定可以喺美洲盃繼續威，我求大俠都買咗少少阿蘇拎神射手，賽前都有9.5倍㗎！點知，阿蘇受傷，烏拉圭踢完頭兩場已經出局，好在喺周一美洲盃C組尾輪分組賽，烏拉圭對牙買加場例行公事入面，阿蘇都冇出場，我求大俠可以去足智彩度退款。講番場波，烏拉圭靠艾保靴南迪斯同馬迪亞斯高路祖各入一球，加埋對手擺烏龍，以3:0贏波。同組另一場，墨西哥就同委內瑞拉踢成1:1平手，墨軍以小組首名出線，而委內瑞拉就得次名。