練馬師方嘉柏今朝好積極，上到烽火台用望遠鏡觀操，並手持計時器親自打錶，睇到入晒神。
究竟邊匹馬咁深得方嘉柏重視呢？原來就係「準備就緒」及「控制者」，呢對頂班馬喺草地跑道拍跳三段，方嘉柏嘅目光，一直冇離開過佢哋身上。
「準備就緒」已報周日(19日)1800米三級賽精英碟，「控制者」則會角逐同日1400米三級賽精英盃，臨唞暑都仍喺草地拍跳三段狂谷狀態，擺到明周日之戰方嘉柏唔係玩玩吓，對佢哋仍充滿期望。
尤其「準備就緒」表面上只合泥地，但睇番二月嗰陣牠跑同程1800米三級賽百週年紀念銀瓶，孭133磅亦後上第六只負兩馬位，甚至上月爭冠軍一哩賽途中搶晒口步速不合亦敗不脫節，可見「準備就緒」今仗精英碟絕對係一路奇兵。