6月15日係一個重要日子，唔單止MSCI是否納入A股會揭盅，呢日仲係中國國家主席習近平嘅63歲生日！MSCI公司喺舊年6月9日公佈檢討結果，今年就選6月15日。有內地股民就估，今年應該會有好消息，為習總生日送大禮。
A股距離成熟市場仲好遠，好多國際投資者仍然反對A股今年「入摩」。但內地股民話，考慮領導人面子因素，MSCI公司今次可能會鬆啲手，就算否決，都會畀出更寬鬆嘅條件，下次再考慮，作為人情。否則等於落領導人面，後果好嚴重咁話。
不過，內地股民咁諗，可能比較一廂情願。大家仲記唔記得，舊年6月15日習總62歲生日，正是A股爆發股災之日，滬綜指創下5176點近年高位後，開始暴跌，至今冇乜起色。事實證明，股市自有規律，唔會畀面任何人。