一向好有個人色彩嘅詹培忠，早前表明會出戰立會港島區選舉，正當大家擔定凳仔等睇金勞詹表演之際，政圈卻傳出佢去咗新加坡養病，到底發生乜事？
《am730》引述金勞詹上周同朋友飲酒後不適，去過醫院求診，其後政圈傳佢係心臟病發！金勞詹回覆該報話，病情「唔係好特別，但亦好危險」，佢話冇心臟病發咁嚴重，但過去曾通波仔，「影響到腳部」，但又話冇影響行動喎，似乎冇打亂參選大計。
八方噚日下午都搵過金勞詹了解，但佢接線後話︰「𠵱家唔傾電話嘞。」之後就收線。八方都祝佢早日康復，皆因個個都等睇佢出戰立會，將689收服。