當年盛傳唔妥曾蔭權而辭官嘅馬時亨，噚日接受商台陳志雲訪問時話，當年到醫院檢查時，因為CT Scanning（電腦斷層掃描）儀器啱啱用緊，醫生建議用MRI（磁力共振掃描），點知驗出血管畸形，覺得命中注定佢要明白健康嘅重要，所以選擇辭官免血壓上升增加腦中風風險。
肥馬話當時煲呔都希望佢留低，仲話可以調佢去其他位㖭，試問又點會同煲呔不咬弦，家陣仲年年見面。
可能對住志雲大師，嘉賓會特別感性，肥馬仲分享大學時期最刻骨銘心嘅一次失戀，佢話當年一位心儀嘅女士突然結婚，心情已經好低落啦，仲獲邀出席對方婚禮，係咪晴天霹靂先？點知去到婚禮更傷心，因為意中人嘅外婆同佢講：「如果我嘅孫女婿係你就好嘞。」嘩，塵世間最痛苦的事，莫過於此咯。