政務司司長林鄭月娥越戰越勇，噚日做署理特首時，更顯氣勢。有傳媒問佢坊間好多有關佢參選特首嘅意向，叫佢講吓最新立場，林鄭竟然叫大家拭目以待，唔通堅嚟料？而全句查實係咁講嘅：「我唔再想評論坊間呢啲傳聞，因為講過好多次，大家又唔相信，咁就講都冇乜意思，我諗大家可以拭目以待。」
好一句「拭目以待」，即係叫市民大眾抹乾淨雙眼等睇戲？政治場上，想參選嘅人猶抱琵琶半遮面，即係話佢未放棄。林鄭口裏沒再說不，身體更誠實。上月佢去四川同傳媒老總密會（提番先，《蘋果》冇份去），八方聽聞會上林鄭講出心底話，當然冇講一定去馬，但就暗踩CY。
暗寸CY不諳政府運作
據知林鄭喺密會上講到，估唔到一個做咗行會召集人咁多年嘅人，竟然對政府運作一竅不通。邊個做咗行會召集人咁耐？仲唔係講緊1999年起擔任行會召集人、至2011年先辭職嘅CY？咁作為政務司司長，佢有冇半點責任？據知林鄭有話呢屆政府都做咗唔少成績，似乎係想講今屆政府喺一竅不通領導下，仍然做出成績，林鄭讚緊邊個都好明顯啦！
查實2012年林鄭回應會否選特首時話過：「我真係完全冇野心。」4年過去，八方聽聞，西環不下一次問林鄭選唔選，有人最新答案係「畀我返去考慮吓」。八方就上述兩個消息問過政務司司長辦公室，截稿前未獲回覆。
李八方
mailto:[email protected]