距離里約奧運已經唔夠兩個月，但當地仍不時傳嚟搶劫、槍擊、寨卡病毒、海灣水質惡劣等負面新聞，不過喺上周二由里約完成練習賽返港嘅香港滑浪風帆代表，鄭俊樑同盧善琳就同大家派定心丸。噚日喺赤柱航海學校見傳媒嘅港隊，今日再出發去里約集訓同比賽。佢哋話喺當地唔會單獨外出，以防被人打劫喎。代理總教練陳敬然、教練茹詠豪、物理治療師及心理輔導員都會隨行，預計呢次備戰要使超過100萬港元，所有費用由體院支付。
啱啱喺巴西返港嘅鄭俊樑同盧善琳，異口同聲話比賽場地嘅海灣水質有改善，不時有船清理垃圾，賽場嘅保安都有明顯加強，又會做足防蚊措施，絕對唔擔心咁話。今次港隊提早個幾月到里約，除咗進一步適應當地環境外，仲希望可以同中國、南韓、以色列及荷蘭嘅代表合作，喺當地一齊訓練同比賽；將會參加RS:X男、女子組嘅鄭俊樑同盧善琳，希望可以喺今屆奧運殺入前10名！