喺歐國盃B組嘅英格蘭禮拜四就會硬撼威爾斯，領隊鶴臣喺星期一畀咗半日假班國腳，等佢哋同屋企人聚吓。盛傳有機會對威爾斯踢正選嘅前鋒占美華迪，就趁機見吓新婚老婆碧琪同囡囡蘇菲亞。華迪上月底先同碧琪結婚，婚禮完咗就即刻歸隊備戰歐國盃。至於中場韋舒亞就同未婚妻艾祖安妮行街食飯，艾祖安妮都唔理得啲狗仔隊，不知幾主動，先咀韋舒亞，食完飯之後，佢仲幫男友抹嘴。前鋒哈利卡尼就冇另一半探班，星期一下晝就去咗打高爾夫球。