喺香港電影金像獎曇花一現、現年18歲嘅原島大地，引起大家熱烈討論同高度關注，有見及此，天梭錶由日本請佢嚟香港為「瑞士天梭錶衝破極限挑戰賽Limitless Challenge 2016」拍攝宣傳短片。原島大地喺片中一人飾演兩個角色，要喺鏡頭前打籃球、玩插花、走籃、射三分，又要淋雨狂奔兩粒鐘，拍嗰日仲要係掛咗黃色暴雨警告㖭，認真攞命，不過現場所見，佢不知幾咁開心，來回跑咗30次都冇氣喘，原島大地話：「冇想像過喺黃雨環境下，自己可以一口氣完成室外拍攝，多謝身邊工作人員支持，一齊淋雨，同我一齊捱過。」
讀完書闖演藝圈
原島大地打算喺日本完成學業後，再考慮加入演藝圈，相信佢仍然不忘當年演出過嘅「樂樂」同「橋橋」，喺拍攝短片時佢表現得揮灑自如，吸引到唔少女士眼甘甘咁望到實，搞到佢有啲唔好意思：「只係盡力而為，本着挑戰心態迎戰，唔係為得到認同，所以我唔敢接受大家封我做男神，呢個太遙遠喇，希望將來喺幕前有更具挑戰性嘅演出機會。」
撰文：馮仁昭
