立法會選舉就快殺到，候選人記住影番張靚相吸票，男神劉鳴煒（圖）提提大家，必要時要用美圖秀秀、Photoshop「執相」。唔使執都已係男神嘅劉鳴煒，佢做副主席嘅智經研究中心噚日公佈調查，發現樣貌得分最高嘅兩成區議會候選人，平均得票率為45%，相反，樣貌得分最低嘅兩成候選人，平均得票率為33%。
調查上月喺網上進行，2,240位參加者喺800多位候選人中，抽出6男4女評分，相片都係候選人提交畀選舉事務處嗰張相。受訪者可以喺超級唔鍾意、唔鍾意、鍾意同超級鍾意之間四選一，智經之後將評分同候選人得票率對照。
嫌相片泛黃 唔望鏡頭
劉鳴煒話結果話畀大家聽，想贏面高啲或者多票啲，要認真影番輯靚相，執番好個package，佢嫌部份候選人相片泛黃、甚至唔望鏡頭，唔夠專業。但樣貌都唔保證贏，呢次調查中頭10位最高分嘅女性，排名不分先後為民主黨曾素麗、人力袁彌明、青政鄺葆賢、游蕙禎、獨立泛民楊雪盈、潘詠妍、民建聯呂迪明、郭芙蓉、前新民黨趙哲妤等，6人都落敗。