「小小超」李澤楷事隔4年，再搵天王郭富城賣廣告！香港電訊（6823）旗下網上行今次搵城城化身「寬頻專員」，大戰4個頭戴機頂盒摔角手，力sell自家新機頂盒「now one」。
細心睇，廣告挑機味濃，事關4個摔角手分別着住紅、綠、藍、白褲，正正就係對手TVB（511，電視廣播）台徽4隻色，咁啱TVB前排推出myTV SUPER電視盒，睇嚟城城要KO嘅對手，可能就係Tvbuddy。
城城入屋裝盒一幕，仲要掃走晒電視櫃上嘅機頂盒，擺明就唔放其他盒仔對手在眼內。成個廣告，就連揀咩電影出街都富挑機味，其中《復仇者聯盟2》Hulkbuster一幕，似係寸大台廣告又抄Ironman隻Hulkbuster。