有立法會「多仔公」之稱嘅公民黨陳家洛，有4個千金同一個囝囝，千金吸睛，囝囝就精靈，原來佢對小朋友採取「無為而治」教育，皆因自己都係咁。
中學生涯一支公
家洛話幼稚園度過咗快樂童年，因為輕輕鬆鬆都考第一，小學入咗聖方濟各英文小學後，「第一次英文默書考airplane（飛機），覺得好深」，經歷「挫敗」，小二時更試過中、英、數三科唔及格，成日見家長，當年仲有體罰，數唔清俾老師打過幾多次手板。
直到升上中學成績突飛猛進，中一起一直考前三甲。佢仲係校內「飛魚」，水運會拎獎牌拎到手軟，中三時獲薦到香港體育學院前身銀禧體育中心接受訓練，但當年中三仲有淘汰試，佢每晚練完水返到屋企都10點幾，惟有退出集訓。文武全才嘅佢，係咪好受女同學仰慕？可惜佢讀男校，中六時先收女同學，最終成個中學生涯都一支公。（搵到個咁靚嘅波蘭老婆，拍少幾次拖又何妨吖！）